ویسے تو ملک بھر میں مختلف لائیبریریاں کام کررہی ہیں لیکن لاہور میں ایک ایسی موبائل لائیبریری کا قیام عمل میں لایا گیا ہے جس میں شہریوں کو کتابیں گھر جاکر فراہم کی جاتی ہیں۔
تخلیقی سواری لائیریری نہ صرف پنجاب بلکہ بلوچستان سمیت ملک بھر میں گھروں کے دروازے پر علم فراہم کرنے کے مشن پر گامزن ہے۔ لاہور سمیت ملک بھر میں 18 تخلیقی سواری لائبریریاں قائم کی گئی ہیں۔
اس حوالے سے اے آر وائی نیوز کے پروگرام باخبر سویرا میں سی ای او تخلیقی سواری لائبریری آمنہ کاظمی نے اپنے مشن کے حوالے سے ناظرین کو آگاہ کیا اور اس کے حوصلہ افزا نتائج پر روشنی ڈالی۔
انہوں نے بتایا کہ ہمارا مقصد ان بچوں تک کتابوں کی رسائی دلانا ہے جن علاقوں میں لوگ بنیادی تعلیم سے محروم ہیں، انہوں نے بتایا کہ تمام صوبوں میں ہماری اونٹ لائبریری، بس لائبریری، رکشہ لائبریری، بک بائیکس سمیت 18 مختلف قسم کی لائیبریریاں ہیں۔
ان کا کہنا تھا کہ دور دراز علاقوں میں مختلف لوگوں سے رابطے کرکے پسماندہ علاقوں میں اونٹوں اور دیگر ذرائع سے وہاں کے بچوں تک کتابیں پہنچائی جاتی ہیں، انہوں نے بتایا کہ کتابیں پڑھ کر ان بچوں کی خوشی قابل دید ہوتی ہے۔
from ARYNews.tv | Urdu – Har Lamha Bakhabar https://ift.tt/pNg3O7S
