دبئی انٹرنیشنل ایئرپورٹ کے قریب پہلے فضائی ٹیکسی اسٹیشن کی تعمیر شروع کردی گئی ہے، یہ اعلان نائب وزیر اعظم متحدہ عرب امارات شیخ حمدان بن محمد بن راشد نے گزشتہ روز کیا۔
سماجی رابطے کی ویب سائٹ ایکس پر اپنے پیغام میں ولی عہد شیخ حمدان بن محمد بن راشد نے بتایا کہ مذکورہ ٹیکسی اسٹیشن کے پہلا مرحلے میں ڈاؤن ٹاؤن، دبئی مرینا، اور پام جمیرا میں 2026 سے فضائی ٹیکسیوں کے لیے اپنی خدمات کا آغاز کرے گا۔
خیلج ٹائمز کی رپورٹ کے مطابق ایئر ٹیکسیوں کے لیے یہ اسٹیشن 3100 مربع کلومیٹر پر محیط ہوگا۔ جس میں 42000 ٹیکسیاں لینڈ کرسکیں گی جبکہ ایک لاکھ 70 ہزار مسافروں کے سالانہ ٹیکسیوں پر سوار ہونے اور اترنے کی گنجائش ہوگی۔
رپورٹ کے مطابق یہ نئی سہولت دبئی میں ٹریفک کی بھیڑ کو کم کرنے میں مددگار ثابت ہوگی۔ دبئی انٹرنیشنل ایئرپورٹ سے پام جمیرا تک کا سفر صرف 10-12 منٹ میں طے کیا جاسکے گا، جبکہ اس وقت رش کے اوقات میں یہ سفر 45 منٹ سے زائد میں طے ہوتا ہے۔
یہ منصوبہ بین الاقوامی شراکت داروں کے تعاون سے چلایا جائے گا۔ امریکی کمپنی جوبے ایوی ایشن طیارے کی تیاری، آپریشن اور مسافروں کی نقل و حرکت کی ذمہ دار ہوگی جبکہ برطانوی کمپنی اسکائی پورٹس اسٹیشن کی تعمیر اور آپریشن کی نگرانی کرے گی۔ آر ٹی اے دوسرے ٹرانسپورٹ سسٹمز کے ساتھ انضمام کی نگرانی کرے گا۔
چار مسافروں اور ایک پائلٹ کے لیے گنجائش رکھنے والی یہ فضائی ٹیکسی روایتی ہیلی کاپٹروں کے مقابلے میں بہت کم شور پیدا کرتی ہے۔
نئے مواصلاتی نظام یعنی اڑنی والی ٹیکسیوں کی شروعات سے توقع کی جا رہی ہے کہ سفر کا دورانیہ محض منٹوں تک محدود ہوجائے گا اور مصروف ترین علاقوں میں کم سے کم اخراجات کے ساتھ سفر صرف دس منٹ تک طے ہوجائے گا۔
from ARYNews.tv | Urdu – Har Lamha Bakhabar https://ift.tt/XfhjAEs
