پٹیالہ: بھارتی پنجاب کے شہر پٹیالہ میں ایک دس سالہ معصوم بچی اپنی سالگرہ کا کیک کھانے کے بعد ہمیشہ کی نیند سو گئی تھی، بچی کے دادا کی ویڈیو سامنے آئی ہے جس میں وہ دل دہلا دینے والے واقعے کی تفصیلات بتاتے ہیں۔
پٹیالہ میں رہنے والے اس بدقسمت خاندان کا کہنا ہے کہ ان کی 10 سالہ بچی کی سالگرہ کا کیک کھانے سے موت ہو گئی ہے، یہ کیک آن لائن آرڈر کیا گیا تھا، بچی کی موت سے چند گھنٹے قبل لی گئی ایک ویڈیو بھی سوشل میڈیا پر وائرل ہو رہی ہے جس میں وہ اپنی سالگرہ مناتے ہوئے بہت خوش نظر آ رہی ہے۔
بچی کے دادا نے ویڈیو میں بتایا ’’ہم نے 6 بجے آن لائن کیک کا آرڈر دیا، جو سوا چھ پر پہنچا اور سوا سات پر کیک کاٹا گیا، جسے کھانے کے بعد گھر میں سب کی طبیعت بگڑ گئی، دس سالہ مانوی اور اس سے چھوٹی 8 سالہ بہن کو الٹیاں آئیں، چھوٹی نے الٹی میں کیک نکال دیا لیکن مانوی کا کیک نہیں نکلا۔‘‘
The grandfather of the 10-year-old girl who died after eating cake on her birthday briefed about the whole incident. #patiala pic.twitter.com/g1oLk6Okbo
— Gagandeep Singh (@Gagan4344) March 30, 2024
دادا کے بیان کے مطابق ’’مانوی کے منہ سے جھاگ نکلی تھی، ہم نے اسے معمولی الٹی سمجھا، پھر وہ سو گئی لیکن پھر اٹھی، گلا خشک ہونے کی شکایت کی اور پانی مانگا، پانی پی کر وہ پھر سو گئی، لیکن صبح 4 بجے کے قریب ہم نے دیکھا کہ وہ ٹھنڈی پڑی تھی جس پر ہم اسے اسپتال لے گئے جہاں ڈاکٹروں نے آکسیجن دی، ای سی جی کی اور پھر کہا کہ وہ مر گئی ہے۔‘‘
10 سالہ لڑکی اپنی ہی سالگرہ کا کیک کھا کر موت کے منہ میں چلی گئی
واضح رہے کہ اس واقعے کی ایف آئی آر درج کی جا چکی ہے، تاہم لڑکی کے اہل خانہ کا الزام ہے کہ محکمہ صحت کی جانب سے کوئی کارروائی نہیں کی جا رہی ہے۔ بچی کے دادا نے کہا ’’آن لائن آرڈر کیے جانے والے کھانے کو لے کر لوگوں میں تشویش بڑھ گئی ہے، ڈلیوری پلیٹ فارمز کو چاہیے کہ وہ کھانا چیک کرنے کے بعد صارف تک پہنچائیں۔‘‘
from ARYNews.tv | Urdu – Har Lamha Bakhabar https://ift.tt/LUiZAfv
