یونان میں ہونے والے کشتی ڈوبنے کے اندوہناک سانحے میں پاکستانی تارکین وطن کی بڑی تعداد جان سے ہاتھ دھو بیٹھی ہے جبکہ تاحال سینکڑوں افراد اب بھی لاپتہ ہیں جس کی وجہ سے حکومتی اداروں کی کارکردگی شدید تنقید کی زد میں ہے۔
پنجاب کے مختلف شہروں میں انسانی اسمگلنگ میں ملوث عناصر گروہوں کی شکل میں کام کررہے ہیں اگر یہ کہا جائے کہ ان سفاک اور پیسے کیلئے لوگوں کی جان سے کھیلنے والوں کی پشت پر طاقتور مافیا ہے تو غلط نہ ہوگا۔
اس حوالے سے اے آر وائی نیوز کے پروگرام باخبر سویرا میں سابق ایڈیشنل ڈائریکٹر ایف آئی اے سجاد باجوہ نے ایسے اہم انکشافات کیے جسے سن کر سخت دل انسان بھی اپنے جذبات پر قابو نہ رکھ سکے۔
انہوں نے بتایا کہ انتہائی افسوس کی بات ہے کہ گجرات اور گوجرانوالہ ڈویژن میں ایجنٹ مافیا بہت سرگرم ہے لیکن ان کیخلاف ایسی کارروائیاں نہیں ہوئیں جو ہونی چاہیے تھیں، ایجنٹ مافیا کرپشن اور ملی بھگت سے بچ نکلتی ہے۔
ایف آئی اے کے سابق عہدیدار کا کہنا تھا کہ ایجنٹ مافیا کے دیگر ممالک میں بڑے پیمانے پر گہرے روابط ہیں، اگر ملزمان کو پکڑنے کے لیے نیک نیتی سے کام کیا جائے تو ان کو گرفت میں لانا کوئی بڑی بات نہیں۔
سجاد باجوہ کا کہنا تھا کہ سال 2018میں ایف آئی اے کے ایک کانسٹیبل کو ایجنٹ مافیا نے قتل کروا دیا تھا، کانسٹیبل کو شہید کرنے والے انسانی اسمگلر کا تعلق گجرات سے تھا، ایف آئی اے اور ایجنٹ مافیا کے کچھ افسران نے مل کراس ایجنٹ کو بچالیا۔
انہوں نے بتایا کہ ایف آئی اے کے کچھ افسران نے لواحقین پر دباؤ ڈال کر ایجنٹ سے صلح کرائی، ایف آئی اے میں ہی کچھ ایسی کالی بھیڑیں ہیں جو اس ایجنٹ مافیا کی پشت پناہی کرتی ہیں۔ ،
ہزاروں ایجنٹ ہیں ان کو پکڑنے کے لیے ایک لائحہ عمل بنانا پڑے گا، وزیر اعظم کو ذاتی طور پر نگرانی کرکے ایجنٹس کے خلاف کارروائی کریں، بہتر حکمت عملی اپنا کر انسانی اسمگلنگ میں بڑی حد تک کمی لائی جاسکتی ہے۔
from ARYNews.tv | Urdu – Har Lamha Bakhabar https://ift.tt/Yro8MHW
